Алматы құрамасының аға бапкері Назым Қызайбайдың жағдайы туралы айтты.
Астанада өткен әйелдер арасындағы бокстан әлем кубогының қорытындысы бойынша Алматы құрамасының аға бапкері Долқунжан Камеков өз пікірін білдірді.
"Бұл турнир — біздің құрама үшін маңызды сынақ болды. Өзіміздегі жарыс тек спортшылар үшін емес, бапкерлер штабы үшін де өзіндік емтихан іспеттес өтті. Жалпы командамыз өзіне жүктелген міндетті атқара білді. Дегенмен толыққанды қанағаттанарлық нәтиже деуге келмейді — әлі де жетілдіруді қажет ететін тұстар бар. Ең бастысы, біз әр боксшының мүмкіндігін көріп, қай бағытта жұмыс істеуіміз керек екенін анықтадық", — деді Камеков.
Бапкердің айтуынша, турнир барысында команданың көшбасшыларына ерекше назар аударылған. Соның ішінде Назым Қызайбай финалға дейін сүрінбей жетіп, техникалық және тактикалық шеберліктің жоғары деңгейін паш еткен.
"Назым жеңіл жарақатына қарамастан, әр жекпе-жекте өз мінезін көрсетті. Ол финалда тамаша өнер көрсетіп, өзінің салмақ дәрежесіндегі үздік спортшы екенін тағы бір мәрте дәлелдеді", — деді Долқунжан Камеков.
48 келіге дейінгі салмақ дәрежесінде сынға түскен Назым Қызайбай Астанадағы әлем кубогында алтын медаль жеңіп алды.
