Грек-рим күресінен Париж Олимпиадасының күміс жүлдегері Демеу Жадыраев ұзақ үзілістен кейін боз кілемге қайта шығуға дайындалып жатыр. Бұл туралы Қазақстан құрамасының бас бапкері Қонысбек Төкенов мәлімдеді.
Бапкердің айтуынша, Демеу қазір жаттығу қарқынын арттырып, тамыз айында Германияның Дортмунд қаласында өтетін халықаралық Гран-при турниріне қатысады.
“Демеу Жадыраевтың қазіргі дайындығы жақсы жүріп жатыр. Дортмундтағы жарыс оның спорттық формасын бағалайтын басты сынақ болмақ. Егер нәтиже көрсетсе, әлем чемпионатына қатысатын үміткерлер тізіміне енгіземіз. Ал нәтиже болмаса, басқа спортшыларға басымдық беріледі”, – деді Қонысбек Төкенов.
Парижде жеңіс тұғырынан көрінгеннен кейін Жадыраев бірде-бір халықаралық жарысқа қатысқан жоқ. Бұл – оның бір жылдан кейінгі алғашқы ресми жекпе-жегі болмақ.
