Олимпиада финалы үшін Джалоловтан жеңілген боксшы кәсіпқой рингте дебют жасайды (ВИДЕО)

Тиафактың қарсыласы белгілі болды

26 жастағы неміс боксшысының кәсіпқой бокстағы алғашқы қарсыласы – 35 жастағы поляк Якуб Сосиньски (8 жеңіс, 11 жеңіліс, 1 тең), оның 3 жеңісі нокаутпен аяқталған. Сосиньски мансабын жақсы бастағанымен соңғы 10 жекпе-жекте жеңіліс тапқан.

Олимпиада жолындағы тарихи жекпе-жектер

Парижде өткен Олимпиада-2024 турнирінде Нелви Тиафак аса ауыр салмақта (92 кг-нан жоғары) жартылай финалға дейін жетті. Ол ірі қарсыластарды сенімді жеңіп, жарыс жолын мынадай нәтижелермен жалғастырған:

• Мухаммад Абдуллаев (Әзербайжан) – 5:0
• Диего Ленци (Италия) – 5:0
• Баходир Джалолов (Өзбекстан) – 0:5

Айта кетейік, Джалолов бұл турнирдің алтын жүлдегері атанды.

Спорттық жетістіктері

Нелви Тиафак – 2022 жылғы Еуропа чемпионы және екі дүркін Еуропа ойындарының қола жүлдегері (2019, 2023). Камерун тумасы Германия атынан халықаралық жарыстарға қатысып жүр.

Кәсіпқой бокстағы болашағы қандай?

Қазір Тиафак ешқандай промоутерлік компаниямен келісімшартқа отырған жоқ. Алайда инсайдерлердің хабарлауынша, британдық Matchroom Boxing және Queensberry Promotions секілді алпауыт ұйымдар оны өз қатарына қосуға ниетті.