
Рио Олимпиадасының чемпионы, қазақстандық кәсіпқой боксшы Данияр Елеусінов АҚШ-тың Вашингтонда өткен бокс кешінен кейін алдағы жоспарларын айтты.
“Бұл жекпе-жек – біздің жаңа кәсіби лигамызға дайындық алдындағы маңызды қадам. Лиганың атауы ZUFFA болады. Рингсіз ұзақ уақыт тоқтап қалмау үшін осы кездесуді өткізуге шешім қабылдадық. Рингке шығу – әрқашан жауапты сәт. Қарсылас кім болса да, тыңғылықты дайындық қажет”, – деді Елеусінов.
“Мұндай формат АҚШ-та жиі қолданылады. Бұған дейін Майамиде Top Rank кешінде де дәл осындай шатыр қойылып, қонақтар жиналатын кеште өнер көрсеткенмін”, – дейді ол.
Жекпе-жек алдындағы дайындығын Питтсбург қаласындағы тәжірибелі бапкер Томас Янкеллоның қол астында өткізгенін атап өтті.
“Егер бәрі жоспар бойынша жүрсе, қыркүйекте қайта рингке шығамын. Ал 2026 жылдың қаңтарында ZUFFA лигасы басталады. Бұл лигада мықты қарсыластар болады. Бастысы – ритмнен шықпау. Рейтинг өзгеріп жатыр, мансап жалғасып жатыр”, – деді Данияр.
Жаңа кәсіби лиганы UFC президенті Дана Уайт пен Сауд Арабиясындағы промоутерлер бірлесіп іске асыруда. ZUFFA жобасы – әлемдік бокс сахнасында ауқымды платформа болуға үмітті.
Данияр Елеусінов (13-0, 8 KO) өткен демалыс күндері Филиппин боксшысы Джеймс Бэконды (26-5, 17 KO) екінші раундта техникалық нокаутпен жеңді. Сол кеште тағы бір қазақстандық – ауыр салмақтағы Иван Дычко (15-0, 14 KO) да өнер көрсетіп, Сэмюэл Кроссдты (АҚШ) бірінші раундта нокаутқа жіберді.