Ерлер мен әйелдер құрамасы алғаш рет өтетін World Boxing ұйымдастыруындағы әлем чемпионатына қызу дайындалып жатыр. Бұл туралы Қазақстан құрамасының бас бапкері Қайрат Сәтжанов мәлімдеді.
Сәтжановтың айтуынша, команда 21 шілдеден 7 тамызға дейін Алматы облысындағы “Жанашар” базасында алғашқы оқу-жаттығу жиынын өткізіп жатыр. Бұл кезеңде басты назар — спортшылардың жалпы физикалық дайындығын арттыруға бағытталған.
“Бізге Камачо бауырлары көмектесіп жатыр. Олар жалпы физикалық дайындық бойынша халықаралық тәжірибесі бар мамандар. Ал 14–26 тамыз аралығында екінші кезеңдік жиын өтеді. Кейін 26 тамызда команда Англияға аттанады”, – деді Сәтжанов.
2025 жылғы 4–14 қыркүйек аралығында бокстан әлем чемпионаты Англияның Ливерпуль қаласында, M&S Bank Arena аренасында өтеді. Бұл — World Boxing ұйымының ұйымдастыруымен алғаш рет өткізілетін әлемдік деңгейдегі турнир болмақ.
Чемпионат аясында ерлер және әйелдер арасында 10 салмақ дәрежесі бойынша үздіктер анықталады.
