Қазақстан құрамасының жас жұлдызы Санжар Тәшкенбай Ливерпульдегі әлем чемпионатында алғашқы айқасын сәтті өткізді.
50 келіге дейінгі салмақ дәрежесіндегі 1/8 финалда Тәшкенбай Иордания өкілі Хутайфа Эшишпен қолғап түйістірді. Үш раундқа созылған айқаста төрешілердің шешімімен қазақстандық боксшы жеңіске жетті. Қорытынды есеп — 3:2.
Осылайша Санжар Тәшкенбай ширек финалға шықса, қарсыласы чемпионаттағы жолын аяқтады.
Әлем чемпионаты-2025 — World Boxing ұйымының тарихында алғаш рет ересектер арасында ұйымдастырылып отырған дүбірлі дода. Жарыс 14 қыркүйекке дейін жалғасады.
