Әлем және Азия чемпионаттарының жүлдегері, Токио Олимпиадасына қатысқан Серік Теміржанов Семейде өтіп жатқан Қазақстан чемпионатын жарқын жеңіспен бастады.
Павлодарлық боксшы Семейде өтіп жатқан Қазақстан чемпионатының алғашқы жекпе-жегінде қарсыласын толық басымдықпен тізе бүктірді.
Айта кетейік, бұл жолы турнир World Boxing ұйымының жаңа ережелері мен салмақ дәрежелері бойынша ұйымдастырылып отыр — яғни, жарыстың маңызы ерекше.
Павлодар облысының намысын қорғаған Серік Теміржанов алғашқы айқасында түркістандық Нұрасыл Тұлыбекті рингте айқын басымдықпен жеңді. Төрешілердің шешімі бір ауыздан шықты — 5:0.
Теміржанов жекпе-жекте өзінің жоғары жылдамдығын, дәл соққыларын және тәжірибесін көрсетті. Әсіресе орта дистанциядағы комбинациялары мен қорғаныстағы сенімділігі қарсыласына еш мүмкіндік бермеді.
Айта кетейік, Серік Теміржанов — 57 келіге дейінгі салмақта әлем және Азия чемпионаттарының күміс жүлдегері, сондай-ақ Токио Олимпиадасының қатысушысы. Бұл жолы ол жаңа салмақта (60 кг) бақ сынауда.
