«Канело» залындағы қазақстандық боксшы керемет камбэк жасады
Семейде бокстан өтіп жатқан Қазақстан чемпионаты тартысты жекпе-жектермен жалғасуда.
Әбілхан Аманқұл – жеңісті камбэк иесі
85 келіге дейінгі салмақ дәрежесінде өткен 1/4 финалдық кездесуде жамбылдық Әбілхан Аманқұл мен алматылық Сержан Еркін рингке шықты.
Алғашқы раундта жеңісті қарсыласына беріп қойған Аманқұл кейінгі екі раундта жағдайды түбегейлі өзгертіп, 5:0 есебімен сенімді жеңіске жетті.
Әлемдік деңгейдегі тәжірибелі боксшы
Айта кетейік, Әбілхан Аманқұл — 2017 жылғы әлем чемпионатының күміс жүлдегері және Азия чемпионатының қола иегері. Ол сондай-ақ Токио Олимпиадасында ел намысын қорғаған. Кейін кәсіби боксқа ауысып, он жекпе-жек өткізген.
Боксшы біраз уақыт Сауль «Канело» Альварестің жаттығу залында дайындалған. Интернетте тараған бір бейнероликте мексикалық чемпион Аманқұлдың спарринг кезінде қарсыласын корпусқа соққымен нокаутқа түсірген шеберлігіне тәнті болған сәт бейнеленген.