Астанадағы QAZAQSTAN BARYSY-2025 республикалық турнирі күтпеген нәтижемен аяқталды. Қазақ күресінің ең беделді жарысында биыл чемпиондық белбеуді Шымкент қаласының балуаны, әскери спорт клубының өкілі Марат Байқамұров иеленді.
Байқамұров финалда былтырғы чемпион, Семейден келген Ерасыл Қажыбаевты тартысты жекпе-жекте аяқтан шалу тәсілімен жеңіп, елді таңғалдырды.
Көпшілік Қажыбаевты басты фаворит санап, белбеуді екінші жыл қатарынан қорғайды деп күткен еді. Алайда Байқамұров қарсыласын шеберлікпен қапы қалдырды.
Финал алдында екі балуан да бес белдесуден қатар жеңіспен өткен. Екеуі де Қазақстан ерлер құрамасы сапында дзюдо спортынан ұлттық деңгейде өнер көрсетеді.
Марат Байқамұров биыл мамыр айында алғаш рет “Үлкен дулыға” кезеңінде үздік үштікке еніп, тарихи жетістікке жеткен. Айта кетерлігі, ол жүлдені дәл осы Жақсылық Үшкемпіров атындағы аренада жеңіп алған.
