Семейде бокстан Қазақстан чемпионатында Түркістан облысының намысын қорғап жүрген Сәкен Бибосынов жартылай финалға жолдама алды.
55 келіге дейінгі салмақ дәрежесінде жұдырықтасқан Бибосынов Қарағанды облысының өкілі Нұрислам Бекенді үш раунд бойы толық басымдықпен ұтып, төрешілердің бірауыздан шығарған шешімімен — 5:0 есебімен жеңіске жетті.
Бұл нәтиже Сәкенге кем дегенде қола медальді қамтамасыз етті.
Айта кетейік, Сәкен Бибосынов — 2021 жылғы әлем чемпионы, Токио-2020 Олимпиадасының қола жүлдегері, сондай-ақ Азия біріншіліктерінің бірнеше дүркін жүлдегері.
Биылғы Қазақстан чемпионаты алғаш рет World Boxing ұйымының жаңа ережелері мен салмақ дәрежелері бойынша ұйымдастырылып отыр. Турнирдің финалдық кезеңдері 21 қазанға дейін жалғасады.
