Сербияның Нови-Сад қаласында өтіп жатқан күрестен 23 жасқа дейінгі спортшылар арасындағы әлем чемпионатында қазақстандық балуан Мерей Мәулетқанов керемет нәтижи көрсетті. Ол грек-рим күресінен 72 келі салмақ дәрежесінде қола медаль иегері атанды.
Үшінші орын үшін болған шешуші белдесуде қазақстандық балуан ресейлік Данила Григорьевті айқын басымдықпен ұтты. Белдесу басталған сәттен-ақ Мәулетқанов қарсыласына мүмкіндік бермей, өз тактикасын толық жүзеге асырды. Тартысты сәттерге жол бермей, есепті 10:0 нәтижесімен аяқтады. Ерік пен шеберліктің жоғары деңгейін көрсетті.
Жарыстың 1/8 финалында Мерей болгариялық Сергей Стоевті 8:0 есебімен ұтса, ширек финалда түркиялық Эрен Улкуді 9:0 нәтижесімен жеңді. Тек жартылай финалда Өзбекстан спортшысы Аброр Атабаевқа (1:3) аз ғана айырмашылықпен есе жіберді.
Айта кетсек, бұған дейін Мәулетқанов ересектер арасындағы әлем чемпионатында бесінші орынға табан тіреген.
Мерей Мәулетқанов туралы деректер:
Кадеттер арасындағы әлем чемпионатының қола жүлдегері (2018)
Азия чемпионатының финалисі (U15, 2018)
Азия чемпионатының қола жүлдегері (U20, 2023)
Азия чемпионы (U23, 2024)
Аттестат: Қазақстан Республикасының спорт шебері, халықаралық дәрежедегі спорт шебері
Дүниежүзілік рейтинг: 6-орын (33 520 ұпай)
