Өзбекстанның қос дүркін Олимпиада чемпионы Хасанбой Дусматов жоспарланған титулдық жекпе-жегінен бас тартуға мәжбүр болды.
Бұл туралы боксшы өзінің Instagram парақшасында хабарлады. Дусматов жанкүйерлеріне бейнеүндеу жолдап, себепті түсіндірді:
«Ассалому алейкум, қадірлі отандастар! Бүгін менің кәсіби рингтегі жекпе-жегім өтуі керек еді, алайда денсаулығыма байланысты аздаған қиындықтар туындады. Бұл 12 раундтық ауыр кездесу болғандықтан, тәуекел етпеуді жөн көрдік. Сондықтан жекпе-жек келесі шоулар мен турнирлерге ауыстырылды. Кешірім сұраймын және баршаңызға денсаулық тілеймін!»
Айта кетсек, бүгін Дусматов IBF тұжырымы бойынша ең жеңіл салмақтағы белбеу үшін мексикалық Рене Калистомен (23-1-1, 9 КО) жұдырықтасуы тиіс болатын. Бұл кездесу Бішкекте өтеді деп жоспарланған еді.
Алайда өзбек боксшысы салмақ өлшеу рәсімінен өте алмай, титулдық айқастан шеттетілді.
Қазір Дусматов командасы жаңа жекпе-жек мерзімін талқылап жатыр. Әзірге оның қарсыласы мен нақты күні жарияланған жоқ.
Бокс жанкүйерлері спортшының толық қалпына келіп, келесі кездесуде өз биігінен көрінуін күтуде.
