Еркін күрестен ел құрамасының үздігі грек-рим күресі бойынша сынға түсті.
Алматыда өтіп жатқан еркін, грек-рим және әйелдер күресінен Қазақстан чемпионаты күтпеген жағдаймен есте қалды — ел құрамасының үздігі Әлішер Ерғали финалға шықты.
Таң қаларлығы сол, еркін күрестен Азия чемпионаттарының үш дүркін жүлдегері, 125 келіге дейінгі салмақта ел құрамасының көшбасшысы саналатын Әлішер Ерғалибұл жолы 130 келілік грек-рим күресі бойынша жарысқа қатысты.
Ерғали жартылай финалда осы салмақтың басты фавориттерінің бірі — Әлімхан Сыздықовты жеңіп, финалға жолдама алды.
«Әрине, грек-рим күресіне бейімделу оңай емес, бірақ бұл да сол бір спорт түрі ғой. Ең бастысы — қарсыласқа құрметпен қарау. Әлімхан — өте мықты балуан, мен оны қатты сыйлаймын. Қиын жеңіс болды, бірақ мақсатым орындалды. Алматыда еркін күресте қарсылас аз болған соң, осылай шештім. Көп уақыттан бері классиктермен бірге жаттығып жүрмін», — деді Ерғали.
Екі стильде өнер көрсетуге дайын. Журналистер сұрағына жауап берген спортшы:
– Енді грек-рим күресімен де айналысуды жоспарлап отырсың ба?
«Иә, бұйыртса!» — деп қысқа қайырды Әлішер.
– Екі стильде де күресесің бе?
«Иә», — деп нық жауап берді ол.
Биыл Әлішер Ерғали әлем чемпионатына да қатысып, өкінішке қарай, алғашқы белдесуде жеңіліп қалған еді.
