Ресей бокс федерациясы жаттықтырушылар кеңесінің төрағасы Эдуард Кравцов Дубайда IBA әлем чемпионатында өткен ресейлік Джамбулат Бижамов пен Ерасыл Жақпеков арасындағы даулы жекпе-жекке пікір білдірді.
67 келіге дейінгі салмақта өткен жекпе-жек төрешілердің бөлек шешімімен (4:1) Бижамовтың жеңісімен аяқталды. Үшінші раундта Ерасыл Жақпеков ресейлік қарсыласын нокдаунға түсіргенімен төрешілер жеңісті Бижамовқа берді.
Осы жағдай қазақстандық жанкүйерлер арасында үлкен наразылық туғызды. Көпшілігі қазылар шешімін әділетсіз деп бағалап, әлеуметтік желілерде бұл туралы ашық жаза бастады.
Эдуард Кравцовтың айтуынша, жекпе-жек өте тартысты өткен, ал Жақпеков өзін жоғары деңгейдегі боксшы ретінде көрсете алған.
«Бұл жекпе-жек шынымен де өте жақын және даулы болды. Үшінші раундты Ерасылдың пайдасына беруге болатын еді. Бірақ жалпы алғанда, кездесу тең дәрежеде өтті, сондықтан нәтижені талқылап, дау қылғым келмейді. Мұнда, ең алдымен, адам факторы – әр судьяның субъективті көзқарасы рөл ойнады», – дейді Кравцов.
Оның сөзінше, жағдай IBA президенті Умар Кремлёвпен де талқыланған.
«Біз бұл жекпе-жекті Умар Кремлёвпен бірге қарадық. Ол қазақстандық боксшыны қолдауға барынша күш салуды тапсырды – әрі карьералық, әрі қаржылық тұрғыдан. Ерасылға IBA-ның алдағы кәсіби турнирлерінің бірінде жекпе-жек өткізу туралы ұсыныс жасауды ұйғардық. Сол кездесуден кейін оны IBA Challenge жобасымен кәсіби келісімшартқа отырғызу мүмкіндігін қарастырамыз», – деді ресейлік маман.
Кравцов Ерасыл Жақпековтің соққы күші мен мінезін ерекше атап өтті.
«Ерасылда нағыз нокаутерге тән соққы бар. Мінезі мықты, мектеп көрген, жақсы дайындалған жігіт. Ол болашақта мықты кәсіпқой боксшыға айналу үшін барлық алғышарттарға ие. Біз оның кәсіби карьерасын дұрыс бағытта құруға көмектесуге дайынбыз», – деді ол.
Осылайша даулы төрелік шешімнен кейін де қазақстандық боксшының аты халықаралық деңгейде жиі аталып, IBA аясындағы кәсіби бокста жаңа мүмкіндіктерге жол ашылуы мүмкін.
