Қазақстандық кәсіпқой боксшы Жәнібек Әлімханұлының допингке қатысты ісінде маңызды жаңалық шықты. Қолдағы ақпаратқа сәйкес "B" допинг-сынама нәтижесі де тыйым салынған заттың барын растаған. Осыған байланысты спортшы істің толық қаралуы аяқталғанға дейін жекпе-жектерден уақытша шеттетілген.
Бұл туралы Қазақстан кәсіпқой бокс федерациясының (ҚКБФ) президенті Рақымжан Ерденбеков мәлімдеді. Оның айтуынша, АҚШ-тағы VADA ұйымынан (қорытынды сараптама) көлемді материал келген және сол қорытындыда “B” сынамасының нәтижесі бастапқы деректі жоққа шығармаған.
Ерденбековтің сөзінше, қазіргі сәтте істің юрисдикциясы ҚКБФ-ға өткен. Себебі Әлімханұлы федерацияда лицензияланған боксшы, ал оның қатысуымен өткен соңғы бокс кеші Астанада федерацияның санкциясымен ұйымдастырылған.
Федерация басшысы істің ең өзекті тұсын да атап өтті. Тыйым салынған зат спортшы ағзасына қасақана қабылданды ма, әлде басқа жолмен түсті ме? Қазір басты мәселе осы бағытта талданып жатыр.
19 қаңтар күні өткен тыңдалымда істі қарау процесіне тәуелсіз сарапшылар, сондай-ақ ҚР Туризм және спорт министрлігі тарапынан өкілдер қатысқаны айтылды.
Мәлімет бойынша тыңдалым барысында халықаралық спорт құқығының стандарттары басшылыққа алынып, спортшының кінәсіздік презумпциясы сақталып отыр.
Ерденбековтің айтуынша, тыңдалымда Жәнібекке көп сұрақ қойылған. Ол сәуірден бері спортшының допинг дауына дейінгі кезеңі жан-жақты қаралып келе жатқанын жеткізді. Сондай-ақ 19 қаңтардағы отырыста жаңа деректер шыққан, бірақ әзірге жария етілмейді. Келесі тыңдалым 23 қаңтарға жоспарланған.
ҚКБФ басшысының дерегінше, істің материалдары қарау аяқталған соң тиісті ұйымдарға жіберіледі. Соның ішінде WBO, IBF және басқа да жауапты құрылымдар бар.
Қорытынды шешімді дәл осы ұйымдар қабылдайды. Әлімханұлы титулдарынан айырыла ма, әлде айрылмай ма — соңғы сөз соларға тиесілі. Ал әзірге спортшы тыңдалым біткенше жекпе-жекке шықпайды.
