Қазақстандық дзюдошы Ғұсман Қырғызбаев Австриядағы беделді Grand Prix турнирінде атақты грузиялық қарсыласын жеңді.
Дзюдодан Австрияда өтіп жатқан Grand Prix турнирінде Ғұсман Қырғызбаев 66 келіге дейінгі салмақта тәжірибелі грузиялық балуан Важа Маргвелашвилимен кездесті.
Грузиялық спортшы — Токио Олимпиадасының күміс жүлдегері, ал Қырғызбаев — Париж Олимпиадасының қола жүлдегері. Осыған байланысты бұл белдесу турнирдегі ең қызық қарсыласулардың бірі ретінде бағаланды.
Кездесу өте сақ әрі шиеленісті жағдайда өрбіді. Екі дзюдошы да бір-бірінің қорғанысындағы әлсіз тұсты іздеп, тәуекелге көп бара қойған жоқ. Соның салдарынан екеуі де екі реттен "шидо" ескертуін алды.
Белдесудің бір сәтінде қазақстандыққа енжар қимылы үшін жаза қолданылуы да мүмкін еді. Алайда дәл шешуші мезетте Ғұсман Қырғызбаев белсенділікті арттырып, қарсыласын "юко" әдісімен лақтырып, жеңісті жұлып әкетті.
Осылайша қазақстандық дзюдошы golden score кезеңінде жеңіске жетіп, ширек финалдық сыннан сүрінбей өтті.
Енді Ғұсман Қырғызбаев жартылай финалда бразилиялық Рональд Лимамен татамиге шығады.
