Дзюдодан Қазақстан қоржынына тағы бір медаль түсті

Қырғызстандық балуаннан басым түсті

Отандасымыз 90 келіге дейінгі салмақ дәрежесінде сынға түсті. Үшінші орын үшін өткен белдесуде Айдардың қарсыласы қырғызстандық Эрлан Шеров болды. Тартысты өткен кездесуде қазақстандық дзюдошы 1:0 есебімен жеңіске жетіп, тұғырға көтерілді. 

Айдар Арапов жарыс барысында бірнеше мықты қарсыласпен белдесті. Алғашқы айналымдардың бірінде Таиланд өкілі Вэй Пуянгтан басым түсті. Бірақ ширек финалда Оңтүстік Корея дзюдошысы Ким Джонхунға жол берді.

Содан кейін жұбаныш белдесуінде Айдар тайваньдық Пэн-ю Чэнді жеңіп, қола медаль үшін күресуге мүмкіндік алды. Шешуші сында мүмкіндігін мүлт жібермей, жарысты жүлдемен аяқтады.

Қазақстанның Азия чемпионатындағы нәтижесі

Осыған дейін Қазақстан құрамасына алтын медальді Әділет Алмат сыйлады. Ол 81 келіге дейінгі салмақ дәрежесінде чемпион атанды.

Сонымен қатар Есмігүл Құйылова (63 келі), Аруна Жангелдина (78 келі) және Абылайхан Жұбаназар (81 келі) Азия чемпионатын қола жүлдемен аяқтады.
Ордос қаласында өтіп жатқан дзюдодан Азия чемпионаты 19 сәуірге дейін жалғасады.