Мұхамедсабыр Базарбайұлы даулы жеңілістен кейін мәлімдеме жасады

Қазақстандық боксшы Мұхамедсабыр Базарбайұлы Бразилияның Фос-де-Игуасу қаласында өтіп жатқан World Boxing Әлем кубогындағы даулы жеңілісінен кейін жанкүйерлерге үндеу жасады.

Даулы жекпе-жек

65 келіге дейінгі салмақ дәрежесінде өнер көрсеткен Базарбайұлы 1/4 финалда франциялық Уго Граумен қолғап түйістірді. Жекпе-жек барысында қазақстандық спортшы алғашқы екі раундта басым болғанымен, төрешілер жеңісті қарсыласына берді — 3:2.

Бұл шешім жанкүйерлер мен сарапшылар арасында қызу талқыланды.

Төрешілерге санкция

Қазақстан бокс федерациясы ресми түрде World Boxing ұйымына шағым түсіргеннен кейін, жекпе-жекті бағалаған үш төрешіге санкция қолданылды. Олардың екеуі турнирдегі төрелік ету құқығынан айырылды.

Дегенмен, жекпе-жек нәтижесі өзгеріссіз қалатыны белгілі болды.

Жеңілістен кейін Мұхаммедсабыр Базарбайұлы әлеуметтік желіде жазба жариялап, жанкүйерлеріне алғыс білдірді:

"Өкінішке қарай, бұл жолы жеңіс бұйырмады. Бірақ әр жеңіліс — бұл сабақ. Мен бұдан да мықты болып ораламын, қателіктерімді түзетемін және алға қарай жүруді тоқтатпаймын. Қолдау көрсеткен барлықтарыңызға рахмет! Бұл тек бастамасы. Ең мықты сәттер әлі алда", – деп жазды ол.