Шавкат Рахмоновтың октагонға қашан оралатыны белгілі болды
DAR Team командасының бас бапкері Эдуард Базров спортшының жарақатынан кейінгі қалпына келу барысы туралы айтып, ықтимал мерзімді атады.
Sports.kz басылымына берген сұхбатында Эдуард Базров қазіргі таңда Майкл Моралеске қарсы жекпе-жек бойынша келіссөз жүріп жатпағанын мәлімдеді.
“Қазір ешқандай келіссөз жоқ. Ең жақсы жағдайда Жаңа жылдан кейін ақпан айында ораламыз. Жекпе-жекке дайындалу үшін кемінде үш айлық оқу-жаттығу жиыны қажет. Алдымен аяғындағы жарақатты толық емдеп алуымыз керек. Мүмкін бір жарым айдан кейін ғана толыққанды күресуге мүмкіндік туады. Содан кейін ғана дайындық кезеңін бастауға болады”, – деді Базров.
Тізе жарақаты толық жазылмаған
Шавкат Рахмонов ауыр тізе жарақатына байланысты оңалту курсынан өтіп жатыр. Еске салсақ, қазақстандық файтердің UFC-дегі соңғы кездесуі 2024 жылдың желтоқсанында өтті. Ирландиялық Иэн Гэрримен өткен кездесуде отандасымыз төрешілердің бірауыздан шығарған шешімімен жеңіп, жеңіліссіз сериясын жалғастырған болатын.