UFC жұлдыздары келеді. Америкалық лига Қазақстанда турнир өткізбек

Еркін күреске негізделген кәсіби жарыстар ұйымдастыратын америкалық Real American Freestyle (RAF) промоушені Қазақстанда турнир өткізуді жоспарлап отыр. Бұл туралы RAF Moscow жарысы алдындағы баспасөз мәслихатында мәлім болды.

Оған сай, промоушен алдағы уақытта Қазақстанмен қатар Өзбекстан, Тәжікстан, Үндістан және Қытайда да жарыс өткізуді көздеп отыр.

Ұйым өкілдерінің айтуынша, жобаның негізгі мақсаты – әлемнің үздік балуандарына үлкен сахнада бәсекеге түсуге мүмкіндік беру және көрермендерге тартысты спорттық шоу ұсыну.

RAF-та қазақстандық спортшылар да өнер көрсетеді

Лига жарыстарына Қазақстаннан бірнеше танымал спортшы қатысады.

Олардың қатарында:

• еркін күрестен әлем чемпионы Ризабек Айтмұхан;
• UFC файтері Асу Алмабаев;
• қазақстандық ММА шебері Қуат Хамитов бар.

UFC жұлдыздары да белдеседі

Real American Freestyle турнирлерінде тек кәсіби балуандар ғана емес, UFC-дің қазіргі және бұрынғы танымал спортшылары да өнер көрсетіп жүр.

Олардың арасында Хамзат Чимаев, Тайрон Вудли, Генри Сехудо, Мераб Двалишвили, Колби Ковингтон және Арман Царукян бар.

Сондықтан Қазақстанда өтетін турнирге де халықаралық деңгейдегі танымал спортшылардың келуі ықтимал.

RAF қандай лига?

Real American Freestyle – еркін күреске негізделген кәсіби промоушен.

Осы формат арқылы RAF классикалық еркін күресті шоу элементтерімен біріктіріп, оны кең аудиторияға ұсынуды көздейді.

Қазақстандағы турнирдің нақты өтетін күні мен қаласы әзірге жарияланған жоқ.