Асу Алмабаев титулдық белдесуде жеңіске жетті

Қазақстандық файтер Ыстамбұлда өткен бразилиялық джиу-джитсу және грэпплинг бойынша ACBJJ 22 турнирінде өнер көрсетті.

Титулдық жекпе-жекте жеңіске жетті

Асу Алмабаев 60 келіге дейінгі салмақта тәжікстандық Халим Назрулоевпен кездесті. Бұған дейін қарсыласы 13 жекпе-жектің барлығында жеңіске жеткен.

All-Stars Title Match мәртебесіндегі кездесу No-Gi ережесі бойынша, яғни кимоносыз күрес форматында өтті. Белдесу қорытындысында төрешілер бірауыздан қазақстандық спортшының жеңісін тіркеді. Осылайша, Асу Алмабаев жаңа спорттық бағыттағы жарыста чемпиондық титулға ие болды.

Алмабаевтың соңғы жекпе-жектері

Асу Алмабаев бұған дейін RAF 12 еркін күрес турнирінде де өнер көрсеткен. Қазақстандық файтер америкалық Джонни ДиДжулиуспен белдесуде бір жарым минуттан кейін қарсыласқа есе жіберді.

Ал Алмабаевтың ММА-дағы соңғы ресми жекпе-жегі маусым айында өтті. Ол америкалық Чарльз Джонсонды үшінші раундта сабмишн әдісімен жеңді. Асу Алмабаевтың кәсіби ММА рекорды 24 жеңіс және 3 жеңіліс.