Жуырда ғана ол UFC-дің чемпиондық титулы үшін жұдырықтасқан еді.
UFC-дің жеңіл салмақ дәрежесі бойынша чемпиондық титулға үміткер болған Ренато Мойкано ресейлік Ислам Махачевпен жұдырықтасқаны үшін қанша ақша алғанын ашып айтты. Бразилиялық файтердің сөзіне сенсек, аталған жекпе-жектен ол шамамен миллион доллар табыс тапқан.
"Маған қомақты қаржы берді. Сомасы 9,5 биткоиннан асады", - деді Мойкано Show Me The Money YouTube-арнасында.
Қазіргі уақытта бір биткоинның бағасы шамамен 105 мың доллар тұрады. Сәйкесінше, Ренато миллион долларға жуық ақша алған.
Естеріңізде болса, қаңтардың 18-інен 19-ына қараған түні АҚШ-тың Лос-Анджелес қаласында Мойкано жарақат алып қалған Арман Царукянды алмастырып, Махачевпен жекпе-жекке шыққан еді. Бұл кездесуде бразилиялық жауынгер қарсыласына бірінші раундта-ақ жеңіліп қалды. Ал Махачев төртінші мәрте титулын қорғап қалды.
