Бразилиялық аралас жекпе-жек шебері (ММА) Маурисио Руффи Лас-Вегаста өткен UFC 313 турнирінде әсерлі жеңіске жетті.
Руффи бұл кештің негізгі кардында өнер көрсетті. Оның қарсыласы жеңіл салмақтағы (70,3 кг дейін) америкалық Кинг Грин (шын аты – Бобби Грин) болды.
Кездесу үш раундқа есептелгенімен бірінші раундта-ақ аяқталды. Бразилиялық спортшы басымдықты өз қолына алып, қарсыласын соққылармен есеңгіретіп үлгерді. Үшінші минутта Грин торға шегінген сәтте, Руффи айналмалы соққымен оның басынан тепті. Америкалық бірден есінен танып құлады, ал рефери жекпе-жекті тоқтатып, нокаут тіркеді.
Бұл жеңіс Руффи үшін қатарынан жетінші, ал жалпы кәсіби мансабындағы 12-жеңіс болды (1 ғана жеңіліс). Ол UFC аясында өткізген үш жекпе-жегінің бәрінде жеңіске жетті.
Турнир қорытындысы бойынша 28 жастағы бразилиялық файтер “Кештің үздік өнері” номинациясы бойынша 50 мың доллар (шамамен 24,5 млн теңге) көлемінде бонустық сыйақы алды.
Ал оның қарсыласы Кинг Грин қатарынан екінші рет жеңіліске ұшырады. Қазір оның кәсіби рекорды – 32 жеңіс, 17 жеңіліс, 1 тең нәтиже және 1 нәтижесіз аяқталған жекпе-жек.
