Қазақстандық кәсіпқой боксшы Балауса Мұздыман (6-0, 5 КО) 5 сәуірде Астанада рингке шығады.
Бастапқыда оның қарсыласы ретінде жеңілмеген америкалық Розалинда Родригес (14-0, 3 КО) көрсетілген еді. Бірақ BoxRec мәліметі бойынша, Мұздыманның жаңа қарсыласы – филиппиндік Мария Тереза Пинили (7-1, 2 КО) деп өзгертілген.
Қарсыластың өзгеру себебі ресми түрде жарияланған жоқ. Жекпе-жек жеңіл салмақта өтеді және сегіз раундқа жоспарланған.
5 сәуірде өтетін астаналық бокс кешінің басты оқиғасы – Жәнібек Әлімханұлының (16-0, 11 КО) шаршы алаңға шығуы болмақ. Ол Франция өкілі Анауэль Нгамиссенгемен (14-0, 9 КО) WBO және IBF орта салмақтағы әлем чемпионы титулы үшін жұдырықтасады.
