Алуа Балқыбекова бокстан Сербияда өткен әлем чемпионатында алғашқы кездесуге кешігіп қала жаздаған.
Бұл туралы ол Olympic.kz сайтына берген сұхбатында айтты.
"Ең бірінші жекпе-жегіме кешігіп қалуға шақ қалдым. Негізі, мен алтыншы жұпта едім. Маған дейінгі екі жұптың бәсекесі қысқа уақытта аяқталған болатын. Сол себепті, кездесуге уақытында келе алмай қалдым.
Содан кейін "Қазақстан"жазуын алып шығатын қыз менен бұрын шығып кетті. Жанкүйерлерім алаңдап, барлығы маған жаза бастады. Көңіл-күйімде түсіп кетті. Өзім де басында мән-жайды түсінбей қалдым. Себебі бәрі де қарбаласып кетті. Осылайша жарыстың ең бірінші күні есімнен кетпеді", — деді Алуа.
Қазақстандық спортшы жарыстың бірінші күні кениялық Вероника Нзивамен кездескен болатын. Үш раундтың қорытындысы бойынша Алуа 5:0 есебімен жеңіске жетті.
