"Nomad Promotions" промоутерлік компаниясының құрылтайшысы Рустам Қуаншалиевтың айтуынша, осы уақытқа дейін билеттердің жартысынан сәл астамы сатылып кеткен.
5 сәуірде Астанадағы "Барыс Аренада" айтулы бокс кеші өтеді. Бұл кештің басты жекпе-жегі — WBO және IBF тұжырымдары бойынша орта салмақтағы әлем чемпионы Жәнібек Әлімханұлы мен франциялық Анауэль Нгамиссенге арасындағы айқас болады.
Іс-шара қарсаңында ұйымдастырылған баспасөз мәслихатында "Nomad Promotions" промоутерлік компаниясының құрылтайшысы Рустам Қуаншалиев бокс кешіне қатысты бірнеше маңызды мәліметпен бөлісті. Атап айтқанда, ол билеттердің сатылымы мен көрермендер ағыны жайында сөз қозғады.
Рустам Қуаншалиевтің айтуынша, бокс кешіне әкімдік пен министрлікке белгілі бір көлемде билеттер тегін берілген. Бұл — спортты қолдау және бокс мәдениетін кеңінен насихаттау мақсатында жасалған қадам.
«Әкімдік пен министрлікке, көптеген федерацияға тегін берілді. Қалған билеттер ашық сатылымда. Қазір сатылымға шығарылған билеттердің жартысынан сәл астамы сатылып кетті. Сатылым мерзімі бокс кеші басталғанға дейін жүргізіледі, — деді ол.
Айта кетейік, кештің басты жекпе-жегінен бөлек, рингке Батыр Жүкембаев, Султан Заурбек, Баходир Жалолов, Сабырхандар бауырлары және басқа да кәсіпқой боксшылар шығады.
