"Қазақтар қазақша сөйлесе, баяғыда үйренер едім" - "Ақтөбе" футболшысы
Жуырда ғана «Ақтөбе» клубына ауысқан Георгий Жуков қазақ тіліне қатысты пікір білдірді.
Қазақстан құрамасына ұзақ үзілістен кейін қайта шақырту алған жартылай қорғаушы Георгий Жуков қазақ тілін үйренуге қатысты пікір білдірді. Бұл туралы ол «Boroda Abata» YouTube арнасына берген сұхбатында айтты.
Жуков қазақ тілін қайдан үйренген?
Футболшы қазақ тілін Қытайда жүрген кезінде ұйғырлардан үйренгенін атап өтті. Себебі ұйғыр тілі мен қазақ тілі ұқсас, сондықтан күнделікті тыңдау арқылы Жуков қазақша аздап түсінуді меңгерген.
«Қазақ тілін Қытайдағы ұйғырлардан үйрендім. Ол жақта ұйғыр ойыншылары көп, ал қазақ тілі сол тілге ұқсайды. Тыңдай беріп, түсіне бастадым. Егер "Астана" мен "Қайратта" бәрі қазақша сөйлесе, баяғыда-ақ үйреніп алар едім», — деді “Ақтөбе” футболшысы Георгий Жуков.
Жуков неше тіл біледі?
Георгий Жуков — полиглот. Оның айтуынша, ол бес тілді еркін меңгерген, ал тағы бірнешеуін белгілі бір деңгейде түсінеді:
- Еркін сөйлейтін тілдер: фламан, ағылшын, француз, орыс және поляк;
- Түсінетін тілдер: испан, қазақ және қытай (бастапқы деңгей).
«Қытайша өзіме керегін сұрап ала алатындай деңгейде білемін», — деді “Ақтөбе” ойыншысы Георгий Жуков.
Жаңа клуб — «Ақтөбе»
Айта кетейік, өткен аптада Жуков «Ақтөбе» клубының футболшысы атанды. Ол бұған дейін:
- Қазақстанда — «Қайрат»,
- Польшада — «Висла» Краков, «Пуща»,
- Қытайда — «Цанчжоу Майти Лайонс» командаларында ойнаған.
Сондай-ақ Жуков Қазақстан құрамасы сапында 20-дан астам матч өткізіп үлгерген.