"Манчестер Юнайтед" "Челсидің" бразилиялық жартылай қорғаушысын қатарға қосты
"Манчестер Юнайтед" 22 жастағы Андрей Сантостың трансферін ресми түрде жариялады.
Ұзақмерзімді келісімшарт
Бразилиялық футболшы жаңа клубымен 2031 жылдың маусымына дейін есептелген бес жылдық келісімшартқа қол қойды. Келісімді тағы бір маусымға ұзарту мүмкіндігі қарастырылған.
Трансфердің нақты құны клубтар тарапынан ресми түрде жарияланған жоқ. Ағылшын басылымдарының мәліметінше, “Манчестер Юнайтед” ойыншы үшін шамамен 48 миллион фунт төлеп, тағы екі миллион фунтты бонус ретінде қарастырған.
“Челсиде” тұрақты орын ала алмады
Андрей Сантос “Челсиге” 2023 жылдың қаңтарында бразилиялық “Васко да Гама” клубынан ауысқан. Бірақ жас жартылай қорғаушы лондондықтардың негізгі құрамында бірден тұрақтай алмады.
Тәжірибе жинау мақсатында “Васко да Гама”, “Ноттингем Форест” және франциялық “Страсбур” клубтарында жалға ойнады. Әсіресе, Франция чемпионатындағы кезеңі футболшының Еуропадағы мансабына серпін берді.
Өткен маусымда Англия чемпионатында 13 кездесуді негізгі құрамда бастап, тағы 14 матчта алаңға қосалқы құрамнан шықты. Сондай-ақ Англия кубогы мен Лига кубогындағы ойындарға қатысты.
Сантос Майкл Карриктің алғашқы трансфері
Андрей Сантос “Олд Траффордқа” ауысқаннан кейін “Манчестер Юнайтедте” өнер көрсету өзі үшін ерекше сезім екенін айтты. Бразилиялық футболшы манчестерлік клуб сапында өзінің бала күнгі кумирлері ойнағанын атап өткен.
Жартылай қорғаушының трансфері Майкл Каррик тұрақты бас бапкер қызметіне тағайындалғаннан кейін жүзеге асқан алғашқы ірі келісім болды.
Бұған дейін манкуниандық клубтың “Астон Вилла” мен Бельгия құрамасының жартылай қорғаушысы Юри Тилемансты қатарына қосуға әрекет жасап жатқаны хабарланған.
Ағылшындық БАҚ мәліметінше, “Манчестер Юнайтед” бельгиялық ойыншының келісімшартында көрсетілген 35 миллион фунт көлеміндегі өтемақыны төлеуге дайын. Дегенмен Тилеманстың трансфері әзірге ресми түрде жарияланған жоқ.