"Атырау" бірде-бір матч өткізбеген легионерге 19,25 млн теңге төлейді
ФИФА "Атырау" клубын ганалық шабуылшы Гилберт Кумсонға жалақы қарызы мен келісімшарт талаптарының бұзылғаны үшін өтемақы төлеуге міндеттеді.
Клуб қанша қаражат төлеуі керек?
Amanvibe.kz мәліметінше, ФИФА-ның Дауларды шешу палатасы "Атырау" мен Кумсон арасындағы еңбек дауына қатысты шешім шығарған. Клуб футболшыға мына сомаларды төлеуге тиіс:
5,5 млн теңге – жалақы бойынша берешек;
13,75 млн теңге – келісімшарт талаптарының бұзылғаны үшін өтемақы.
Жалпы сома 19,25 млн теңге болды. Бұған жылдық 5% мөлшерлемемен есептелетін пайыздар кірмейді.
Кумсон неге ФИФА-ға жүгінді?
Дереккөздің жазуынша, "Атырау" оның виза және жұмыс істеуге рұқсат алуына қажетті құжаттарды рәсімдемеген. Сонымен бірге шабуылшының матчтарға қатысуына жағдай жасалмаған.
Осыдан кейін Кумсон келісімшартты бұзып, өз құқығын қорғау үшін ФИФА-ға шағым түсірген.
Ганалық шабуылшы клубпен келісімшарт жасасқанымен, "Атырау" жейдесінде бірде-бір ресми матч өткізбеген. Соған қарамастан еңбек дауының қорытындысы бойынша клубқа жалақы берешегі мен өтемақыны төлеу міндеті жүктелді.