Көкшетауда энергетик ішкен жасөспірімнің асқазаны жарылып кете жаздады.
"Горилла" сусыны — қауіпті тәуелділікке айналды ма?
Көкшетауда 16 жастағы оқушы энергетикалық сусындарды тұрақты тұтынып ауыр халге түсті. Ол қатты іш ауруына шағымданып, шұғыл түрде Ақмола облыстық көпбейінді балалар ауруханасына жеткізілген. Дәрігерлер жасөспірімге дереу лапароскопиялық операция жасап, өмірін аман алып қалды.
Операция кезінде науқастың асқазаны тесілуімен қатар, іш қуысында жайылған іріңді перитонит анықталды. Бұл өмірге тікелей қауіп төндіретін диагноз. Хирургия бөлімінің меңгерушісі Ернар Қожабековтың айтуынша, бұл жағдай — энергетикалық сусындарға тәуелділіктің салдары.
"Науқаста перфорацияланған жара мен іріңді перитонит болды. Бұл ұзақ уақыт бойы энергетик ішу салдарынан болған. Оның асқазаны енді бұрынғы қалпына келмейді. Тыртықтар мен жара іздері мәңгі қалады", — деді Қожабеков.
Мамандардың айтуынша, қазір науқастың өміріне тікелей қауіп жоқ, бірақ толық қалпына келу ұзақ уақытты қажет етеді. Бұл жағдай энергетикалық сусындардың жас организмге қаншалықты зиян екенін тағы бір дәлелдеді.
