Белгілі әзілкеш Тұрсынбек Қабатовтың жеке өміріне қатысты тағы бір жанжал қоғам назарын аудартты. Бұл жолы оның екінші әйелі көпшіліктен кешірім сұрап, әлеуметтік желі арқылы бейнеүндеу таратты.
Оның айтуынша, бұған дейін тараптар арасындағы келісім бойынша ешқандай ақпарат жарияланбауы тиіс болған. Алайда қазіргі жағдай оған мүмкіндік бермеген. Себебі Мөлдір есімді азаматшаның тарапынан қысым үдеген.
"Мен халқымнан кешірім сұраймын. Фильм шыққанға дейін үндемедім. Барлығы өз арамызда қалады деп келіскен едік. Бірақ қазір Мөлдір ханым тарапынан қысым жасалып жатыр. Оған Тұрсынбек те араша бола алмай отыр. Жұмысым тоқтап қалды. Сондықтан мәжбүрлі түрде осы үндеуді жасап отырмын", – дейді ол бейнежолдауында.
Жанжалға түрткі болған оқиға – белгілі бір фильмнің жарыққа шығуы. Аталған фильмнен кейін екінші жұбайы барлық жағдайды ашық айтуға келісіп еді, алайда күткен нәтиже болмаған. Сонымен қатар оның кәсіби жұмысына да кедергі келтірілген.
Осы себепті, әлгі азаматша баспасөзге жүгініп, бар шындықты айтудан басқа жол қалмағанын мәлімдеді.
Желі қолданушылары оқиғаға қатысты түрлі пікір білдіруде. Бірі Қабатовқа қолдау білдірсе, енді бірі жеке өмірді ел алдында талқылаудың орынсыз екенін айтуда.
