Жаздың ыстығында аяқтың ауырлауы, ісінуі жиі кездесетін мәселе. Сарапшылардың айтуынша, бұл құбылыс қан айналымының баяулауына байланысты.
Жоғары температурада тамырлар кеңейіп, қанды жүрекке айдайтын қақпақшалар әлсірейді. Соның салдарынан қан аяқта жиналып, ауырлық сезімін тудырады.
Сертификатталған пилатес пен йога жаттықтырушысы Лаура Пуччини бұл мәселені жеңілдету үшін күн соңында небәрі 10 минут уақытыңызды бөліп, қарапайым жаттығулар орындауды ұсынады:
Тік тұрып, аяқтарды иық деңгейінде қойыңыз. Саусақ ұшына көтеріліп, қайтадан өкшемен түсу керек. Бұл қимылды 30 рет қайталаңыз. Ол қан айналымын белсендіреді және тобықтағы ауырлықты азайтады.
Жаттығуды төсеніште жатып орындаңыз. Саусақтарыңызды алдымен еденге қарай, кейін жоғары бағыттап, аяқ ұшын кезек-кезек бүгіп-жазыңыз. Бұл қарапайым қозғалыс тобықтағы қан айналымын жақсартады.
Жатып алып, аяқтарыңызды көтеріп, кезекпен тізеңізді бүгіңіз. Велосипед тепкендей қимыл веноздық ағысты күшейтіп, қанды жүрекке қайта айдауға көмектеседі.
Жатып алып, аяқтарыңызды жоғары көтеріп, тобықты алдымен ішке, кейін сыртқа қарай айналдырыңыз. Осы қалыпта аяқтарыңызды жеңіл сілкіңіз. Бұл жаттығу ыстық күндері жиналған қаттылықты жояды.
Күні бойы серуендеу, велосипед тебу немесе жүзумен айналысу аяқтағы ауырлықты азайтып, қан айналымын жақсартады.
