Көкшетаудағы "Оқжетпес" стадионы уақытша жабылады. Аренада жөндеу жұмыстарының жүргізілуіне байланысты клуб алдағы екі айда өз алаңында матч өткізе алмайды.
“ЖаркOFF” Telegram-арнасы таратқан мәліметке сәйкес стадион жүгіру жолақтарын жаңартуға байланысты жабылып, футбол алаңы да уақытша қолжетімсіз болады. Бұл Көкшетау клубының өз алаңындағы артықшылықтан айырылуы деген сөз.
“Оқжетпес” ФК енді жазғы маусымдағы үй ойынын Шымкент немесе Петропавлда өткізуі мүмкін. Қазір бұл екі қала негізгі балама ретінде қарастырылып жатыр.
Егер бұл шешім ресми түрде бекітілсе, команда Көкшетау жанкүйерлерінен уақытша алыстайды. Бұл жағдай олардың ойын қарқынына және турнирлік жағдайына әсер етуі мүмкін.
Қазақстан Премьер-лигасының алғашқы он турында “Оқжетпес” 17 ұпай жинап, турнир кестесінде алтыншы орында тұр. Клуб келесі ойынын 31 мамырда “Қызылжарға” қарсы өткізеді. Матч қосалқы алаңда ойналуы ықтимал.
