Қазақстан футболының аңызы Самат Смақовтың ұлы — 16 жастағы Аламгир Смақов QJ League турниріндегі кезекті ойында алыстан керемет гол соғып, жанкүйерлерді таңғалдырды.
“Қайрат U18 командасы мен “Тобыл” U18 арасындағы матчта жартылай қорғаушы Аламгир алыстан әсерлі соққысымен көзге түсті. Бұл гол әлеуметтік желіде кең таралып, Смақовтар әулетінің футболдағы үздік дәстүрін тағы бір дәлелдеді.
Бұған дейін Аламгир Смақовтың Түркияның “Бешікташ” клубымен келісімшартқа отырғаны белгілі болған. Бірақ жасы кәмелетке толмағандықтан әзірге шетелдік командада ресми ойын өткізе алмайды. Осыған байланысты Аламгир әзірге елде қалып, “Қайрат-Жастар” және QJ League аясындағы ойындарға қатысады.
Аламгир 2023 жылдан бері “Бешікташтың” академиялық жүйесінде жаттығып, өзін техникалық, тәртіпті және келешегі зор ойыншы ретінде көрсеткен. Сонымен қатар Қазақстан U17 құрамасы сапында оннан астам халықаралық матч өткізіп, көшбасшылық қабілетін дәлелдеді.
Осы тұста айта кетейік, Самат Смақов қазір Премьер-лигада “Жетісу” клубының бас бапкері ретінде алғашқы жеңісіне қол жеткізді. Ол — төрт дүркін Қазақстан чемпионы, ұлттық құраманың бұрынғы капитаны және отандық футболдағы ең сыйлы тұлғалардың бірі.
