Бүгін Испанияда жол апатынан қаза тапқан Португалия құрамасының және «Ливерпуль» клубының шабуылшысы Диогу Жота мен оның інісі Андре Силвамен қоштасу рәсімі өтті. Қаралы шараға футбол әлемінің жұлдыздары мен жаттықтырушылар, достары мен туыстары жиналды.
Қаралы шара футболшылардың туған қаласы Гондомарда өтті. Қоштасу қызметі шамамен бір сағатқа созылып, оған отбасы мүшелері, достары, клубтағы әріптестері мен жаттықтырушылар қатысты.
Қоштасу шарасында Вирджил Ван Дейк Диогу Жотаның 20-нөмірі жазылған гүлдестесін көтеріп жүрді. Ал оның командадағы серіктесі Эндрю Робертсон — Андренің 30-нөмірлі гүлдестесін көтеріп шықты. Қаралы процессия кезінде Диогу Жотаның табытын көтергендердің бірі — оның жақын досы Рубен Невеш болды. Бұл сәт әсіресе жанкүйерлер мен футболшылардың жүрегін тебірентті.
Қоштасу рәсіміне футбол әлемінің танымал тұлғалары жиналды: Арне Слот («Ливерпульдің» бас бапкері), Джордан Хендерсон, Бернарду Силва, Бруну Фернандеш, Жоау Феликс, Жозе Фонте, Фабиньо, Тиаго Алькантара, Руй Патрисиу, Рикарду, Андре Орта және Ренату Вейга сынды жұлдыздар марқұмдарға соңғы құрметін білдірді.
Қаралы шараға футболшылардан бөлек, мынандай бапкерлер мен функционерлер де келді: Фернанду Сантуш, Нуну Эшпириту Санту, Роберто Мартинес, Андре Виллаш-Боаш.
Футболшылар Жоау Канселу мен Рубен Невеш АҚШ-та өткен "Әл-Хилал" — "Флуминенсе" матчын аяқтай сала, арнайы рейспен Португалияға ұшып келді. Олардың әрекеті футболшылар арасындағы достық пен жанашырлықтың жарқын көрінісі.
Португалияның екінші лигасында өнер көрсететін «Пенафиэл» клубының ойыншылары, марқұм Андренің командасы, қоштасу рәсіміне толық құрамда қатысты. Олар бауырлардың қазасына ортақтасып, құрмет көрсетті.
Диогу Жота мен Андре Тейшейра да Силваның кенеттен қайтыс болуы — Португалия футболы ғана емес, бүкіл әлемдік футбол қауымдастығы үшін ауыр соққы болды.
