13 шілде күні "Барселонаның" жас жұлдызы Ламин Ямаль 18 жасқа толды. Алайда футболшының туған күн кеші тек мерекелік шара емес, даулы оқиғамен аяқталды.
Футболшының туған күніне танымал тұлғалармен қатар, карликтік (өсу кемістігі) диагнозы бар адамдар да қатысқан. Осыған байланысты AS басылымы ахондроплазия және басқа да скелеттік дисплазиялармен өмір сүретін адамдардың ассоциациясы жасаған мәлімдемені жариялады.
Мәлімдемеде былай делінген:
"Біз Ламин Ямальдың туған күн кешінде ойын-сауық мақсатында карликтік диагнозы бар адамдарды жалдағанын қатаң түрде айыптаймыз. Бұл – адам қадірін таптау. Біз бұл мәселеге заңдық және қоғамдық тұрғыда тиісті шара қолданамыз."
Қауымдастық бұл әрекетті кемсітушілік пен қорлау деп бағалап, футболшының әрекетіне қарсылық білдірді.
Оқиға Испания мен халықаралық БАҚ-та кеңінен талқыланып жатыр. Қоғам белсенділері жас футболшының танымалдылығына қарамастан мұндай әрекеттің жауапкершілігі болуы керек деп санайды.
Ламин Ямаль бұл мәселеге қатысты әзірге ешқандай ресми пікір білдірген жоқ.
