Қазақстанның мемлекеттік спорттық телеарнасы Qazsport УЕФА Чемпиондар лигасындағы "Қайраттың" алғашқы екі ойынын көрсету құқығына ие бола алмады.
Словениялық “Олимпиямен” өткен бірінші іріктеу кезеңінің екі матчы да ел арналарында көрсетілмей қалды. Бұл жағдай футбол жанкүйерлері арасында ашу-ыза тудырды.
Qazsport директоры Нағи Бақытбеков матчтарды сатып алуға қаражаттың жоқ екенін алға тартты. Оның айтуынша, телеарнаның “Қайраттың” Чемпиондар лигасындағы ойындарының трансляциялық құқықтарын сатып алуға шамасы келмеген.
Футбол сарапшылары мен жанкүйерлері бұған бейжай қараған жоқ. Telegram-дағы match.kz_ арнасы мемлекеттік арна басшылығын сынға алып, Нағи Бақытбековтің қызметінен кетуін талап етті.
"Былтыр Qazsport ИМТ мен “Копердің” ойындарын трансляциялау құқығын сатып алды. Ол клубтарда сол кезде қазақстандық футболшылар Александр Зуев пен Рамазан Оразов ойнаған. Бірақ олар бірнеше аптадан соң-ақ клубтарынан кетіп қалды. Ал биыл арна клубтық әлем чемпионатын көрсету құқығын сатып алды. Бірақ өзіміздің “Қайраттың” матчтарын көрсетуге ақша таппаған. Бұл – масқара. Бақытбеков бұл қызметте отыруға лайық емес. Біз бұл тақырыпқа міндетті түрде ораламыз. Оның кетуі үшін кем дегенде 20 себеп бар", – делінген арна жазбасында.
