Себеп — матч соңында жанкүйерлер алаңға заттар лақтырып, қарсылас ойыншы жарақат алған.
Польшалық «Легияға» қарсы өткен матчтан кейін УЕФА «Ақтөбе» клубына қатысты тәртіптік шара қолдануы мүмкін. Оған себеп — кездесуден кейін жанкүйерлердің алаңға түрлі заттар лақтыруы және қарсылас ойыншының жарақат алуы.
17 шілде күні Ақтөбеде өткен қарымта ойында қазақстандық клуб 0:1 есебімен жеңіліп, екі матчтың қорытындысы бойынша (0:2) УЕФА Еуропа лигасынан тыс қалды.
Ойын барысында алаңда қызу бәсеке байқалды. Алайда жанкүйерлердің матч соңындағы әрекеті футбол мәдениетіне сай болмады.
Кездесу аяқталған соң ақтөбелік жанкүйерлер алаңға бөтелке, заттар лақтыра бастаған. Бұл тәртіпсіздіктің салдарынан «Легия» шабуылшысы Жан-Пьер Нсаме жарақат алды. Ақпараттарға сүйенсек, лақтырылған заттың бірі оның басына тиген.
УЕФА бұл тәртіп бұзушылықты назардан тыс қалдырмайды. Еуропалық футбол қауымдастығы жанкүйерлердің әрекетін зерттеп, «Ақтөбе» клубына айыппұл немесе басқа да санкциялар қолдануы ықтимал.
Мұндай жағдайлар УЕФА ережелеріне сәйкес жоғары деңгейдегі жауапкершілікке жатады. Бұған дейін де Еуропа лигасында мұндай әрекеттер клубтарға қомақты айыппұлмен аяқталған.
