Жанкүйерлер төрешіге қарсы фаер жағып, балағат сөздер айтқаны үшін клубқа 393 мың теңге айыппұл салынды.
Қазақстан футбол федерациясының Бақылау, тәртіптік және этикалық комитеті «Елімай» клубына қатысты шешім шығарды.
13 тамыз күні өткен отырыста комитет 2025 жылғы Қазақстан чемпионатының 20-туры аясында «Елімай» мен «Ақтөбе» арасындағы ойында орын алған тәртіп бұзушылықтарды қарады.
Матч кезінде «Елімай» жанкүйерлері алаң шетінде фаерлер қолданып, бас төрешіге қарсы балағат сөздер айтқан. Бұл тәртіп ережелерін бұзу болып есептелді.
Комитеттің шешіміне сәйкес, «Елімай» футбол клубына 100 айлық есептік көрсеткіш (АЕК) көлемінде айыппұл салынды. Бұл — 393 200 теңгеге тең. Клуб аталған соманы 2025 жылдың 13 қыркүйегіне дейін төлеуі тиіс.
