Алматылық клуб чемпионаттың соңғы кезеңінде және Чемпиондар лигасының плей-офф ойынында маңызды ойыншысынан айырылды. 28 жастағы жартылай қорғаушы Гиорги Зария екі айға дейін алаңнан тыс қалады.
Медициналық тексерістің қорытындысы Зарияның жарақатының ауыр екенін растады. Бұл жағдай футболшыға ағымдағы маусымның қалған бөлігін өткізіп алу қаупін төндіреді.
ҚПЛ-дің 26-турында “Қайрат” басты қарсыласы “Астанамен” кездеседі. Дәл осы матч чемпионаттағы шешуші ойындардың бірі саналады.
“Қайрат” тек ішкі біріншілікте емес, халықаралық аренада да кадрлық қиындықтарға тап болып отыр. Плей-офф кезеңіндегі “Селтикке” қарсы қарымта матчта Александр Заруцкий мен Дастан Сәтпаев алаңға шықпайды. Ал португалиялық қорғаушы Луиш Мата әлі де күмәнді ойыншылар қатарында.
Айта кетейік, алғашқы ойын 0:0 есебімен аяқталған.
