"Селтиктің" бас бапкері Чемпиондар лигасының плей-офф кезеңінде өтетін "Қайрат" – "Селтик" матчына дайындық жайлы пікір білдірді.
Шотландиялықтардың бас бапкері Брендан Роджерс Алматыда өтетін Чемпиондар лигасы плей-офф кезеңіндегі “Қайратқа” қарсы шешуші матч алдында журналистермен ой бөлісті.
Роджерстің айтуынша, команда бар назарын футболға аударуы керек:
“Біз ойынның тек футболдық қырына назар аударамыз. Матчты бақылауда ұстап, қорғаныста сенімді ойнауымыз қажет. Бізде ешқандай сылтау болмауы тиіс. “Қайраттың“ Глазгода қалай ойнағанын көрдік, ұзақ жолды еңсеріп келсе де, тамаша өнер көрсетті. Біз дайындаламыз. Басқа жол жоқ. Не ыстық ауа райы, не уақыт айырмашылығы бізге ақталу болмайды”, – деді Роджерс.
Еске сала кетейік, Шотландияда өткен алғашқы кездесу 0:0 есебімен тең аяқталған. Енді топтық кезеңге жолдама беретін шешуші матч өтеді.
