Өзбекстан құрамасы БАӘ-де өткен Al Ain International Cup-2025 турнирінің жеңімпазы атанды. Финалда көршілеріміз әлем чемпионатынвң қатысушысы Иранды пенальти сериясында жеңді.
Негізгі уақыт 0:0 есебімен аяқталғаннан кейін жеңімпаз пенальти сериясында анықталды. Тартысты сәттерге толы айып добында Өзбекстан футболшылары салқынқандв ойнап, 4:3 есебімен жеңіске жетті.
Финалдық матч өзбектер үшін оңай өткен жоқ. Ойынның 69-минутында қорғаушы Абдукодир Хусанов ирандық ойыншыға қарсы жасалған өрескел фол үшін тікелей қызыл қағаз алып, командасын қиын жағдайға қалдырды.
Соған қарамастан Өзбекстан қорғаныста қатесіз ойнап, негізгі уақытта қақпасын голдан аман сақтап қалды. Команданың осындай мінез танытуы пенальтиде жемісін берді.
Өзбекстан жартылай финалда Египет құрамасын 2:0 есебімен жеңді. Иран Кабо-Вердемен негізгі уақытта 0:0 тең ойнап, пенальти сериясында 5:4 есебімен жеңіске жете алды.
Бұл турнирге қатысқан төрт команда да 2026 жылғы әлем чемпионатына жолдама алып қойған құрамалар. Сондықтан финалдың мәртебесі де, жарыстың деңгейі де жоғары болды.
