«Атырау» футболшылары ҚПЛ-да қалу үшін уәде етілген сыйақыға әлі күнге дейін қолына тигізген жоқ
Sportilinet.kz дерегінше, маусым барысында клуб басшылығы команданы ынталандыру мақсатында ойыншыларға арнайы бонус тағайындаған.
Бұл сыйақылар КПЛ-де орын сақтап қалу, Премьер-лига жолдамасын жоғалтпау секілді міндеттер орындалған жағдайда төленуі тиіс болған. Алайда маусым аяқталғаннан кейін «мұнайшылардың» басшылығы ауысқан соң, футболшылар уәде етілген ақшаларын күтумен қалған.
Басылым мәліметінше, қазір сыйақы төлемдер толықтай тоқтатылған жоқ, тек кейінге шегерілген. Алдын ала ақпарат бойынша ойыншылар сыйақыларын келесі жылдың басында, клуб Қазақстан футбол федерациясының барлық лицензиялау кезеңдерінен өткен соң және ресми түрде ҚПЛ–2026 маусымына қатысу құқығын алғаннан кейін ала алады.
Дегенмен футболшылар мен жанкүйерлер арасында бұл жағдайға байланысты түсінбеушілік туындап отыр.
Өткен маусым қорытындысы бойынша «Атырау» турнир кестесінде 15-орынға табан тіреді. Бірінші лигаға түсіп қалуы мүмкін деген негізгі үміткерлердің бірі болған «Тұранның» орнына ҚПЛ-де қалды.
Келесі маусымнан бастап Қазақстан Премьер-лигасында 16 клуб өнер көрсетеді.
