«Қайсар» жаңа бапкерлік штабын таныстырды

Андрей Ферапонтов – жаңа бас бапкер

Клубтың Instagram-парақшасында 2026 жылғы маусымда «Қайсарды» жаттықтыратын мамандар құрамы жарияланды. Жаңа маусымда қызылордалық команданы:

• Андрей Ферапонтов – бас бапкер;
• Дмитрий Карпов – бас бапкердің көмекшісі;
• Жарқынбек Жоламанов – аналитикалық бапкер;
• Евгений Валентюкевич – физикалық даярлық бойынша бапкер;
• Виталий Кувшинов – қақпашылар бапкері ретінде жұмыс істейді.

Осылайша «Қайсар» алдағы маусымға тактикалық, физикалық және аналитикалық бағытты күшейтуге басымдық бергенін көрсетуде.

Қиын маусымнан кейінгі қайта жүктеу

Еске салайық, «Қайсар» 2025 жылғы Қазақстан Премьер-Лигасы маусымында турнир кестесінде 11-орынмен шектелген еді. Бұл нәтиже жанкүйерлер мен сарапшылар арасында сынға ұшырап, клубтың жаңаруға бет бұруына ықпал етті.

Қазан айында қызылордалық бизнесмен Исламғали Қозбақов клубтың жаңа иесі атанды. Меншік иесінің ауысуы, одан кейін бапкерлік штабтың толық жаңаруы – «Қайсардың» жаңа жобасы мен ұзақмерзімді стратегиясы басталғанының белгісі ретінде қабылдануда.