ҚФФ бас хатшысы Скотт Манн ҚПЛ төрешілеріне арналған семинар өткізді (ВИДЕО)

Скотт Манн төрешіліктің маңызын атап өтті

Қазақстан футбол федерациясы елордада ҚПЛ матчтарына қызмет көрсететін төрешілер, олардың көмекшілері және VAR мамандарына арналған кезекті оқу семинарын ұйымдастырды.

Іс-шара ұлттық чемпионаттың алдағы турлары қарсаңындағы төрешілерді тұрақты даярлау бағдарламасы аясында өткізілді.

Семинарды ҚФФ бас хатшысы Скотт Манн ашып, Қазақстан Премьер-лигасында жұмыс істейтін төрешілермен кездесті.

Ол өз сөзінде төрешілер корпусының кәсіби футболды дамытудағы рөліне тоқталды. Скотт Маннның айтуынша, матчтардағы әділ әрі сапалы төрелік Қазақстан футбол федерациясының негізгі басымдықтарының бірі болып қала береді.

ҚФФ алдағы уақытта да арбитрлерді оқытуға, даярлау жүйесін жақсартуға және алаңдағы шешімдерді қабылдаудың ортақ талаптарын қалыптастыруға көңіл бөлмек.

Төрешілер тестілеуден өтті

Семинардың практикалық бөлімінде қатысушылар кешенді тексеруден өтті.

Төрешілер, ассистенттер және VAR мамандары:

• футбол ережелері бойынша білімдерін тексерді;
• VAR жүйесін қолдану тәртібіне қатысты тапсырмалар орындады;
• әртүрлі ойын эпизодтары бойынша бейнетест тапсырды;
• даулы сәттерді талдау жұмысына қатысты.

Мұндай тексерулер мамандардың дайындық деңгейін бағалауға және спорлы жағдайларды біркелкі түсіндіруге мүмкіндік береді.

ҚПЛ-дегі даулы эпизодтар талданды

Оқу барысында УЕФА ұсынған әдістемелік материалдарға ерекше назар аударылды. Сонымен бірге қатысушылар Қазақстан Премьер-лигасы, Бірінші лига және Екінші лига матчтарында болған даулы эпизодтарды егжей-тегжейлі талқылады.

Бұл жұмыс төрешілердің шешім қабылдау кезіндегі ортақ өлшемдерін қалыптастыруға, төреліктегі тұрақтылықты арттыруға және қателер санын азайтуға бағытталған.

Семинар қорытындысы бойынша арбитрлер теориялық білімдерін жаңартып, практикалық дағдыларын бекітті. Сонымен қатар мамандар Қазақстан чемпионатында қолданылатын бірқатар әдістемелік ұсыныс алды.