"Вашингтон Кэпиталз" командасының ресейлік шабуылшысы Александр Овечкин Ұлттық хоккей лигасының (NHL) ең әйгілі рекорд иесі атанды.
Александр Овечкин NHL-дің тұрақты маусымында 895-ші шайбасын салып, аты аңызға айналған канадалық Уэйн Гретцкидің 1994 жылдан бері сақталған 894 голдық рекордын жаңартты.
Тарихи шайба "Нью-Йорк Айлендерске" қарсы өткен сырт алаңдағы матчтың 28-минутында соғылды.
Голдан кейін ойын тоқтатылып, рекорд жаңартқан Овечкинді арнайы салтанатпен құттықтау рәсімі өтті.
2005 жылы NHL-де дебют жасаған Александр Овечкин бүкіл кәсіби мансабын "Вашингтон Кэпиталз" клубында өткізіп келеді.
Осы маусымда 39 жастағы шабуылшы 60 матчқа қатысып, 41 шайба салып, 27 нәтижелі пас берген.
