Жамбыл облысында өткен көкпар ойыны жәй ғана спорттық жарыс емес, тәртіп бұзушылық пен сот ісіне ұласқан жағдайға айналды. Ойын кезінде дөрекілік танытқан төрт адам әкімшілік жауапкершілікке тартылды.
Оқиға Наурыз мейрамы қарсаңында Жамбыл облысындағы Бауыржан Момышұлы ауылында болды. Ауыл тұрғындары ұлттық дәстүрді ұлықтап, көкпар ойынын ұйымдастырған.
Бірақ ойын барысы бейбіт сипаттан ауытқып, қатысушылардың арасында келіспеушілік пен дөрекі әрекеттерге ұласты. Кейбір шабандоздар қарсыластарын балағаттап, қоғамдық тәртіпті бұзған.
Облыстық соттың хабарлауынша, төрт жергілікті тұрғынға қатысты “Ұсақ бұзақылық” бабы бойынша әкімшілік іс қозғалып, олар 78 мың теңгеден айыппұл төлеген. Айыпталушылар кінәсін толық мойындап, эмоционалдық толқу әсерінен өздерін дұрыс ұстай алмағандарын мәлімдеді.
Бұл жағдай көрермендердің ашуын туғызған. Ұлттық спортты дәріптейтін шараның тәртіпсіздікке ұласуы қоғамда талқылау тудырды.
