Танымал телехикаяның платформадан жойылуына күтпеген кибершабуыл себеп.
16 қазан күні қазақстандық медиа-компания Sәlem Entertainment күтпеген кибершабуылға ұшырады. YouTube-тағы «Пацанские истории» арнасына бағытталған жаппай бот-шабуылдың салдарынан компанияның жаңа жобасы — «Offside» сериалының алғашқы эпизоды платформадан жойылып кетті.
«Offside» — қазақстандық футбол мен жастар өмірін тоғыстырған спорттық драма-жоба. Сериалдың алғашқы бөлімі көрермендер арасында кең талқылау тудырып, аз уақыт ішінде мыңдаған қаралым жинаған болатын.
Алайда, шабуылдан кейін бейнежазба YouTube платформасынан өшірілді.
Сериал авторы Рүстем Омаровтың Instagram парақшасы уақытша бұғатталған.
«Қазіргі уақытта Sәlem Entertainment командасы арналардың қауіпсіздігін қамтамасыз ету және «Offside» жобасының әрі қарай көрсетілімін жалғастыру үшін барлық шараларды жасап жатыр.», — деді Sәlem Entertainment өкілі.
Мамандардың айтуынша, мұндай бот-шабуылдар соңғы уақытта жиілеген. Олар көбіне танымалдылыққа ие контентке, әсіресе футбол, мәдениет және қоғам тақырыбындағы бейнелерге бағытталады.
