Қазақстандық шахматшы Бибісара Асаубаеваның Халықаралық шахмат федерациясы (FIDE) жариялаған жаңартылған рейтингідегі орны белгілі болды.
Қаңтар айына арналған FIDE рейтингінде Бибісара Асаубаева 2497 рейтингтік ұпай жинап, әлемнің үздік шахматшылары арасында 11-орынға тұрақтады. Бұл көрсеткіш оның халықаралық аренадағы жоғары деңгейін тағы бір мәрте дәлелдеп отыр.
Әлемдік рейтингтің көшін 2613 ұпаймен қытайлық атақты шахматшы Хоу Ифань бастап тұр. Үздік үштікке сондай-ақ Қытай елінің өкілдері — Чжу Цзиньэр (2579 ұпай) мен Лэй Тинцзе (2569 ұпай) кірді. Осылайша, қазіргі таңда әйелдер шахматында қытайлық спортшылар айқын басымдыққа ие болып отыр.
Айта кетейік, желтоқсан айының соңында Бибісара Асаубаева өз мансабында үшінші рет блиц шахматтан әлем чемпионы атанып, тарихи жетістікке қол жеткізді. Бұл зор жетістігі үшін ол Қазақстан Республикасының II дәрежелі «Барыс» орденімен марапатталған болатын.
