Алматылық «Қайрат» футзал клубы негізгі ойыншыларының бірі саналатын Біржан Оразов пен Дәурен Тұрсағұловпен келісімшартты ұзарту бойынша ортақ мәмілеге келе алмады.
Futsal Kazakhstan мәліметінше, 2026 жыл күтпеген жаңалықпен басталған. Оразов пен Тұрсағұлов «Қайратпен» жаңа келісімге қол қоймаған. Қазіргі келісімшарттары 2025/26 маусымының соңына дейін күшінде болғанымен тараптар жаңа шарттар бойынша келісімге келе алмаған.
Ақпаратқа сай, қос футзалшы да Алматыда қалуға қарсы емес, алайда жақсартылған шарттарды талап етеді. Яғни мәселе – клубтан кету ниетінде емес, келісімшарт талаптарының көңілден шықпауында.
Дереккөздің жазуынша, ойыншыларға Ресейден екі команда қызығушылық білдіріп отыр. Сонымен қатар жаз мезгілінде «Семей» клубының Тұрсағұловты қатарға қосуды құптайтыны туралы ақпарат тараған.
Біржан Оразов «Қайрат» сапында 2017 жылдан бері ойнап келеді.
Дәурен Тұрсағұлов алматылық клубқа 2018 жылы қосылған.
